Youn nan objektif ki soutni travay UNIR-Haïti se konstwi pon. Pa sèlman atravè espas fòmasyon nou yo nan lang panyòl, men tou lè nou kreye kondisyon pou òganizasyon sosyal ak fanm ayisyen ka pote vwa yo nan espas Abya Yala a.
Nan dènye lane yo, nou patisipe epi nou ankouraje plizyè rankont. Men, politik migratwa yo, difikilte pou jwenn viza, ak fèmti ayewopò entènasyonal Ayiti yo limite anpil posiblite pou moun ayisyen prezan nan espas sa yo. Baryè sa yo pa sèlman administratif, yo se tou yon fòm izòlman ki kenbe Ayiti lwen espas kote dyalòg rejyonal yo ap konstwi.
Nan mwa fevriye sa a, UNIR-Haïti te patisipe nan rankont entènasyonal “Floreceremos”, ki te fèt nan Bogota epi Rezo Fanm Teji Avni te òganize. Pandan senk jou, anviwon 500 fanm ki soti nan diferan teritwa te reyini pou pale sou defans lavi. Espas sa a te pèmèt nou pataje reyalite Ayiti, ranfòse lyen, epi reafime enpòtans pou vwa ayisyen yo prezan nan espas rejyonal kote yo ap konstwi altènativ kolektif.
Nan rankont sa a, UNIR-Haïti ak Vanesa Jeudi te pataje refleksyon nou te konstwi ansanm ak anpil lòt medam ann Ayiti. Vanesa te chwazi prezante tèt li nan lang kreyòl ayisyen, kòm yon lang rezistans, yon lang ki te fèt pou òganize, reziste, epi defann ladiyite yon pèp. Nou te pale tou sou wòl fondamantal Madan Sara yo, fanm komèsan ki soutni ekonomi chak jou peyi a epi ki garanti sikilasyon manje, malgre vyolans, prekaryete, ak mank rekonesans enstitisyonèl.
Prezans Ayiti nan espas sa yo esansyèl. Se pa sèlman pou rann reyalite nou vizib, men tou pou ranfòse alyans, pataje aprantisaj, epi konstwi altènativ ansanm. Eksperyans nou, rezistans nou, ak pwopozisyon nou se yon pati enpòtan nan lit k ap travèse Abya Yala a.
Nou ap kontinye travay pou vwa ayisyen yo prezan, pou yo sikile, epi pou yo jwenn zòrèy pou koute yo.
Pou lavi fleri
